Liquor ban, 10 pm curfew
CEBU, Philippines — Gitinguha sa kadagkuan sa kagamhanan sa siyudad sa Sugbo ipabalik ang mga restriksyon aron mapugngan ang pagkatap og balik sa coronavirus Disease(COVID)-2019.
Apil niini ang pagpasira sa Plaza Independencia ug Fort San Pedro nga niadtong adlaw nga Domingo gidugokan sa daghang mga tawo nga naglakip sa mga bata ug tiguwang ug wala na mosunod sa health protocols.
Si Cebu City acting mayor Vice Mayor Michael Rama mipahibawo nga mopagawas ang siyudad og Executive Order (EO) aron ibalik ang pipila ka mga restriksyon nga gitangtang na ug ipatuman kini sulod sa usa ka buwan.
Gawas sa Cebu City, si IATF chief implementer sa Visayas, ret. General Mel Feleciano nisugyot nga kinahanglang parehason ang protocols sa Cebu City , Mandaue ug Lapu-Lapu batok Covid-19.
Si Rama ug ang mga mayor sa maong mga siyudad niuyon niini apan plantsahon pa nila kini kauban ni Feleciano.
“If we do not do our act now it’s a matter of agreeing that we want to be under ECQ or we wish to maintain being in the Modified General Community Quarantine,” pasabot ni Rama.
Ang mga opisyales sa Cebu City apil na ang naa sa Emergency Operations Center(EOC), mga miyemnro sa private sector ug ubang stakeholders nagpahigayon og ‘multi-sectoral’ meeting niadtong Domingo, Hulyo 25 ug gituki ang pagsaka sa mga kaso sa dakbayan.
Ipatuman og balik ang liquor ban ug sayuhon ang curfew nga magsugod na alas-10 sa gabii inay alas-11 sa gabii human nasuta nga ang ubang napositibo nakuha ang sakit gikan sa mga imnanan.
Sulod na sa pila ka adlaw nga ang siyudad nakasinati og pagsaka sa kaso sa COVID-19 base sa datos sa Department of Health Cental Visayas.
Ang siyudad duna karoy 2,085 ka aktibong kaso ug base sa EOC, ang critical care utilization rate (paggamit sa giandam nga Covid-19 beds sa mga tambalanan) niabot na og 51.5 percent niadtong Hulyo 21, 2021.
Sa pikas bahin, posibleng ibalik ang “one entrance-one exit policy” sa Carbon Market sumala pa sa hepe sa Cebu City Market Operations Division (MOD) Irvin Cabales sama sa gihimo sa miaging tuig.— Caecent No-ot Magsumbol, Sanden Anadia/IBM (BANATNEWS)
- Latest
