P102 mil kantidad sa shabu ang nasakmit

CEBU, Philippines — Nikabat ngadto sa P102,000 ang kantidad  sa shabu nga nasakmi sa kapolisan gikan sa managkapuyo diha sa  Barangay Jubay, Lungsod sa Liloan niadtong Sabado sa gabii.           

Si Police Lieutenant Colonel Jeorge Francis Rodrin, hepe  sa Provincial Intelligence Unit (PIU) ug Provincial Drug Enforcement Unit (PDEU) sa Cebu Provincial Police Office (CPPO)  maoy nangulo sa operasyon.

Giila sa kapolisan ang mga suspetsado nga sila si J.L.M Borres Kilong-Kilong, 30-anyos ug Catherine Samson Montañez, 25, pulos nagpuyo sa maong dapit ug  Allan Smith Labajo, 25-anyos, taga Sitio Cogon sa Barangay San Vicente sa maong lungsod.                 

Naglakip  sa mga ebidensiya nga nasakmit gikan sa mga suspetsado ang 15 gramos nga shabu ug buy bust boodle money nga P35,000 nga gipaibabwan lang og tinuod nga usa ka buok P500.00 nga kwarta.                        

Ang mga suspetsado kinsa natanggong sa detention cell sa Liloan Police Station ang gikatakdang pasakaan og tukmang kaso sa nahimo nilang kalapasan. BDB (BANATNEWS)