Mga hepe paesplikahon kun dunay adunay mapusilan sa ilang AOR

CEBU, Philippines — Paesplikahon ang mga hepe sa nagkadaiyang police station ubos sa Cebu City Police Office (CCPO) kun dunay mahitabong pagpamusil sa ilang hurisdiksyon. Kini pinasubay sa gihimong kausaban sa CCPO sa pamaagi nila sa pagbantay ug pagpatrolya sa kadalanan.

Ning bulana lang, 16 ka mga insidente sa pagpamusil ang nahitabo sa siyudad hinungdan nga mipatuman og kausaban ang CCPO ug gimandoan ang matag police stations sa paghimo og kaugalingong diskarte sama sa pagusab sa ilang naandang pagpatrolya ug pag-deploy og mga polis sa kadalanan base sa bag-ong crime clock sa tagsa-tagsa nila ka hurisdiksyon.

Ang crime clock mao ang oras kung diin sagad mahitabo ang krimen sa ilang hurisdiksyon hasta na kung asang dapita kini mahitabo.

matud pa ni Police Lt. Colonel Wilbert Parilla, Deputy City Director for Operations sa CCPO duna na unyay makitang mga polis bisan lawom na ang gabii hangtud sa kaadlawon diha sa kadalanan nga mga oras sagad may pagpamusil nga mahitabo.

Niadtong adlaw nga Huwebes, duha ka mga insidente sa pagpamusil ang natala sa siyudad lakip na ang pagpatay sa komentarista nga radio blocktimer nga si Rey Cortes, sa gawas sa estasyon sa radyo sa DYRB.

Paglabay lang sa pipila ka minute, usa ka babaye sab nga gituohang nalambigit sa kalihokan sa ilegal nga droga ang gipusil sa Barangay Calamba.

Kung human sa gihimong kausaban duna gihapoy mahitabong pagpamusil ubos sa usa ka police station, paesplikahon ang ilang hepe kung unsay nahitabo sa iyang gihimo pagpalambo sa ilang pagbantay.

“After this kaning deployment nato nga nag strategized nata if ever naa pay nga shooting incident na mahitabo specially katong duna nay mga previous shooting incidents, we will require atong mga chief of police nga mo explain nganong duna gihapon mga shooting incident,” matud ni Parilla.

Si acting Cebu City Mayor, Michael Rama mihagit sa kapolisan sa pag-ingon ‘walk the talk’ nunot sa sagunson nga mga insidente sa pagpamusil sa siyudad.

Si Rama miingon nga kinahanglang dugangan ang police visibility ug mobility tungod kay kining maong mga hitaboa nikompromiso sa seguridad ug kalinaw sa siyudad.

“Ang pinakaimportante gyud because they have assured us days before, this time, they have to walk the talk....the so-called solution has to be quick and fast so that confidence sa mga tawo will continue to be up,” matud pa ni Rama. —IBM (BANATNEWS)