Bontuyan mohangyo nga dili isirado og balik ang CCSC

Cebu, Philippines — Giangkon sa manager sa Cebu City Sports Center Jundel Bontuyan nga wala siya estoryaha daan kalabot sa plano sa kagamhanan sa Dakbayan sa Sugbo nga himuong isolation center ang CCSC diin sa social media ug sa report sa mga tawo na lang siya nasayod niini.

Gibutyag ni Bontuyan nga dili siya pabor sa maong plano tungod kay sa kadaghang lugar nga pwedeng gamiton isip isolation center ang CCSC man ang gipili nga sulod sa 14 ka buwan nasirado gumikan sa pandemiya ug gigamit usab kini kaniadto sa kapolisan apan kon mao gyud ang madesisyon wala sila’y mahimo niini.

Niadtong Mayo 3, 2021 lang gibuksan og balik ang CCSC ug hinay-hinay usab nga nakabalik sa trabaho ang mga tawo nga pipila ka buwan nahunong sa trabaho ug walay sweldo nga nadawat.

Sa pagkakaron ang CCSC adunay 30 ka empleyado ug plano unta ni Bontuyan nga sa kataposang bahin niining tuiga makapabalik na sila sa ilang 50 ka empleyado apan kon  isirado na usab ang CCSC daghan na usab ang mawagtangan og trabaho.

Si Bontuyan gikatakdang makig-estorya kang Bise Mayor Michael Rama ug mohangyo nga paminawon ang sentimento sa kadaghanan.

Nagkanayon si Bontuyan nga dili lang mga empleyado niya ang mga gibati og kabalaka nga mawagtangan og trabaho lakip ang mga manindahay nga nagpalibot sa sports centers nga nagsalig usab sa ilang halin sa mga tawo nga moadto sa sports center.

Nasayran nga gumikan sa nagkasaka nga kaso sa COVID-19 ang  opisyales sa siyudad nangita na og mga lugar nga posibleng gamiton isip isolation center ug usa sa ilang nakit-an mao ang Cebu City Sports Center.

Matud ni Konsehal Joel Garganera, deputy chief implementer sa Inter-Agency Task Force Emergency Operations Center Cebu City ang CCSC usa lang sa mga posibleng lugar nga himuong isolation center. (BANAT NEWS)