Probinsiya sa Sugbo nagpabilin sa “safe level”
CEBU, Philippines — Bisan pa sa nagsaka nga kaso sa COVID-19 sa Probinsiya sa Sugbo nagpabilin gihapon sa “safe level” ang utilization rate o ang mga bakante nga higdanana alang sa mga COVID-19 positive sa probinsiya.
Base sa Hulyo 20, 2021 nga datos sa Provincial Health Office anaa pa sa 95 o upat ka porsyento ang mga nagamit nga higdanaanan sa mga isolation facility sa nagkadaiyang lungsod ug dakbayan sa probinsiya.
Nagpasabot kini nga 2,361 o 96 porsyento pa ang bakante gikan sa 2,456 nga gigahin sa probinsiya.
Matud sa PHO nga sa 16 ka provincial ug district hospital sa probinsiya anaa pa usab sa 88.75 porsyento ang available o bakante nga COVID-19 beds samtang 11. 25 porsyento ang nagamit.
Base sa Department of Health tracker makonsiderar nga “safe level” ang occupancy rate sa usa ka COVID-19 facility kon wala pa kini molapas sa 60 porsyento ang nagamit sa COVID-19 beds.
Ang Kapitolyo nigahin kini og 400 ka higdanana alang sa mga pasyente nga adunay COVID-19, SARI ug ILI diin matud sa PHO 45 ang nagamit na ug aduna pay 355 nga bakante.
Matud ni Dr. Christina Giango, provincial health officer nga niadtong Lunes bag-ohay pa sila nidugang og 100 ka COVID-19 beds sa duha ka isolation facility niini diha sa Women’s Center sa Barangay Lahug ug Apas Evacuation Center sa Barangay Apas. —BDB (BANATNEWS)
- Latest
