Duha patay, usa angol sa duha ka managlahing bangga sa sakyanan

CEBU, Philippines — Patay ang usa ka 31-anyos nga lalaki samtang angol ang uyab niini human sila nabanggai og sa 6-wheeler truck samtang nagbiyahe sakay sa usa ka motorsiklo niadtong Martes sa gabii diha sa national highway sa Barangay Balud, Lungsod sa San Fernando.

Ang nakalas mao si Marianito Caballero, taga Barangay Banlot, Lungsod sa Sibonga, mamohiay og kahayopan ug nagmaneho sa motorsiklo nga ilang gisakyan samtang ang naangol mao si Marilyn Bacarisas, 26, taga Barangay Lamacan, Sibonga.

Ang drayber sa Fuso Canter 6-wheeler truck mao si  Rosendo Maliza, 50, minyo, taga  Barangay Yati, Lungsod sa Liloan.

Base sa imbestigasyon ni Police Senior Master Sergeant Marvin Ando sa San Fernando Police Station nga ang duha ka sakyanan nagbiyahe kini sa managlahi nga direksiyon kinsa si Caballero padulong sa Sibonga samtang si Maliza paingon sa Cebu City.

Giingong si Maliza ni-overtake kini sa duha ka sakyanan nga nag-una kaniya hinungdan nga nabangga kini sa motorsiklo nga gikasagut nga gisakyanan nila ni Caballero ug Bacarisas.

Ang mga biktima kinsa nakaangkon og mga kadaot sa lawas daling gidala ngadto  sa Carcar District Hospital apan si Caballero gideklara kini nga patay na nga naabot sa tambalanan samtang si Bacarisas gidala kini sa usa sa mga tambalanan sa Dakbayan sa Sugbo.

Matud ni Ando nga si Maliza tungod sa kahadlok nisibat kini padulong sa iyang operator diha sa Barangay Labangon, Dakbayan sa Sugbo.

Ug kagahapon sa buntag ang operator ni Maliza nidangop sa kapolisan sa San Fernando ug nakigtagbo sa pamilya sa biktima ug nakigsabot.

Sa laing bahin, patay usab ang usa ka 45-anyos nga lalaki human ang iyang gimanehong motorsiklo nibangga ngadto sa Mitsubishi Gear Van Delica niadtong Martes sa gabii diha sa Barangay Guiwanon, Lungsod sa Barili.

Ang namatay mao si Ernesto Emactao, taga Barangay Tubod, Barili kinsa nakaangkon og grabeng kadaot sa lawas.

Ang nagmaneho sa Gear Delica Van mao si Deardito Creus Layan, 30, taga Barangay Bitoon, Lungsod sa Dumanjug.

Base sa imbestigasyon ni Police Staff Sergeant Michael Villadar ug Police Corporal Bernard Brioso giingong ni-U-turn si Layan ug niadtong higayona nagpaingon si Emactao ug sa giingong ka kusog sa dagan niini wala na kini makapreno hinungdan nga nibangga ngadto sa van.

Ug tungod sa impact nalagpot si Emactao ug nabunal diha sa karsada ug dali kining gidala ngadto sa Barili District Hospital apan pagka alas 8:15 sa gabii gideklara kini ni Dr. Derby Jake Malazarte nga patay na.  —Dale Rose Ostria/BDB (BANATNEWS)