Oplan bulabog kanunay na nga gihimo sa kapolisan

CEBU, Philippines — Matag gabii na himoon sa kapolisan ug ubang ahensya sa gobyerno ang Oplan Bulabog nga gitumong aron mabantayan ang mga establisamento nga wa motuman sa health protocol.

Kini ang gitug-an ni Police Lieutenant Colonel Wilbert Parilla, Deputy City Director for Operations sa Cebu City Police Office.

Matud pa ni Parilla, nga sugod niadtong Lunes matag gabii na sila nga mosuhid sa mga bay patigayon pagsusi kun nisunod ba kini sa mga health protocols.

Laing gitutokan sa kapolisan mao ang mga lugar nga crime prone areas.

Giawhag ni Parilla, ang katawhan nga mosunod lang sa mga gipatuman nga health protocols aron makalikay sila nga madakpan o makamulta.

Samtang estrikto pagbalik ang City of Talisay-Traffic Operation Development Authority (Ct-TODA) sa mga sakyanan nga wala motuman sa health protocol.

Usa ka bus nga nasakpan nga wa motuman sa physical distancing sa mga pasahero ang gidakop sa Talisay.

Matud pa ni Jonathan Tumulak, traffic czar sa siyudad nga nikumpyansa na ang mga tagdumala sa bus ug milugak na sa gipatuman nga lagda.

Asoy pa niya nga kaniadto mopasaylo lang sila apan karon ila na gyud kining dakpon.— Gabriel C. Bonjoc/MEL (BANATNEWS)