Talisay mogahin og vaccination site para sa seniors
CEBU, Philippines — Naglaraw si Mayor Gerald Anthony “Samsam” Gullas nga ibuwag ang vaccination site alang sa mga senior citizens sa dakbayan. Si Gullas nakigtagbo sa mga opisyales sa Office of the Senior Citizen Affairs (OSCA) aron mangusog sa pag-awhag sa ilang mga miyembro nga magpabakuna na.
Usa sa ilang rason nganong di magpabakuna mao ang kahasol ug kahadlok pa gihapon sa bakuna.
Duna nay narehistrong senior citizens nga moabot sa 22 mil ang dakbayan.
Ang Talisay nakabakuna na og 26 mil ka Talisaynon apan gamay pa gyud kaayo ang mga senior citizens nga nagpabakuna batok covid-19.
Matud pa ni Gullas nga kung maabot na ang bakuna himuon nilang prayoridad ang mga senior citizens. Gidasig sa mayor nga mga senior citizens nga magpabakuna tungod kay sila ang menos og resistensya ug ang bakuna mao ang makatabang kanila.
Sa pikas bahin, sugod karong adlawa Hulyo 21 hangtod sa Hulyo 23 temporaryong sirad-an ang Municipal Main Building sa lungsod sa Santander tungod kay pipila sa mga empleyado niini nakitaan og sintomas sa coronavirus disease. Samtang kini sirad-an dunay himuong disinfection sa maong building ug ipaubos sa swab test ang mga kawani.
"Ang opisina sa RHU, Waterworks, MDRRMO, PNP ug MSWDO (skeletal force) magpadayon sa ilang pag hatag of serbisyo" sumala sa announcement ni Mayor Marites Buscato pinaagi sa Facebook page sa Santander.— Le Phyllis F. Antojado /IBM (BANATNEWS)
- Latest
