Gibalibaran sa tambalanan maong namatay?

Cebu, Philippines — Usa ka job order nga kawani ang napalgang patay sa iyang lawak diha sa Barangay Tabunok, Dakbayan sa Talisay niadtong miaging adlaw.

Apan ang mga silingan niini nihulagway nga buhi pa unta si Danilo Rosales, 52, kung gidawat pa kini sa Talisay District Hospital.

Ang mga silingan miingon nga wala nay kabanay si Rosales ug magsud-gawas na kini sa tambalanan gumikan sa gihambin nga sakit.

Si Filbert Jagna, silingan sa namatay  miingon nga gitabang si Rosales tungod sa paglisod og ginhawa ug gidala sa tambalanan apan gikatahong gibalibaran kay puno na.

Gisuwayan sa pagkuha og habig ang tambalanan apan wala sila magpasulod sa mga sakop sa media.

Apan ang gwardya mipasabot nga wala balibari ang pasyenti kundi gipapaabot kini samtang nangita og bakante apan giingong wala kini makapaabot ug miuli kini sa iyang panimay.

Si Police Lt. Noel Lungcob sa Talisay City Police Station nisusi kung ang kamatayon ni Rosales aduna ba kini foul play. Nihatag sab og ayuda aron sa pagpalubong ang kagamhanan sa siyudad. (BANAT NEWS)