Bata gihimong taming, polis naangol

Cebu, Philippines — Nalandig sa tambalanan ang usa ka polis human giingong naunhan pagpusil sa ilang dakponong drug suspect didto sa sitio Paling-Paling, Barangay Jaclupan, Dakbayan sa Talisay niadtong Huwebes sa gabii.

Ang grupo nila ni Patrolman Gilbert James Lusica nitangas sa pinuy-anan sa suspek nga Efren Espina alang sa himuong buybust operation aron kini dakpon.

Si Police Lt. Col. Gerard Ace Pelare, pangu sa Talisay City Police Station miingon nga magpahigayon og buy bust operation ang sakop sa Drug Enforcement Unit (DEU).

Apan sa pagsulod pa lang sa operatiba nakabantay na si Espina nga polis ang mopalit kaniya og ilegal nga drugas. Niuna kini og ibot sa iyang armas samtang ang pikas kamot nagkugos sa iyang anak ug diretsong gipusil ang poseur buyer nga Lusica.

Naigo sa tuo nga abaga si Lusica ug maayo nalang nga nakakita dayon kini og kataguan.

Si Pelare nibutyag nga wala dayon nakabawos ang operatiba tungod kay gihimo sa suspek nga “human shield” ang iyang anak nga nagpangidaron og 6- anyos. Apan ang mga paryente ni Espina nihimakak sa pasangil nga gihimo nga “human shield” ang bata.

Matud pa ni Pelare nga nagbinayloay og bala ang kapulisan ug ang suspek hangtud nga nakagawas ang bata sa ilang pinuy-anan.

Gidala sa luwas nga lugar ang bata hangtud nga gilibotan sa mga polis ang pinuy-anan. Apan gumikan sa kangitngit ug kalisod sa lugar nakaipsot ang suspek.

Duha ka medium packs nga gituohang shabu ang nakuha sa pinuy-anan sa gikatahapan.

Siya nagkanayon nga nadungog na ang pangalan ni Espina nga tigpayuhot og ilegal nga drugas sa dapit ug gikonsiderar nila nga high profile sa pagpamaligya sa ilegal nga drugas sa siyudad.

Matud pa ni Pelare nga magpadayon ang hot pursuit operation hangtud nga madakpan nila si Espina. (BANAT NEWS)