7,000 pa ka senior citizens sa Mandaue ang nabakunahan

CEBU, Philippines — Ang pangulo sa Mandaue City Vaccination Operations Center Atty. Lizer Malate nagkanayon nga 21 porsyento pa sa mga senior citizen sa Dakbayan sa Mandaue ang nabakunahan batok sa COVID-19.

Nasayran nga ang siyudad adunay 36,000 ka senior citizens base sa ilang master list ug 7,000 niini ang nabakunahan na.

Nunot niini, gisubli og dasig ni Malate ang mga senior citizen sa pagpabakuna batok sa COVID-19  sa  pagpanalipod sa severe symptoms  sa maong virus ilabi na sa nagpadayong pagsaka niini.

Si Atty. Malate nagkanayon nga labing maayo nga masayran ang mga hinungdan sa senior citizens nga dili mabakunahan ug ingon man kadtong mga mahimo nga bakunahan.

Si Malate gikatakdang makigkita sa kadagkoan sa Office of the Senior Citizen’s Affair alang sa paghimo og mga lakang sa pagdasig sa mga senior citizen u gang pagpasabot ngadto kanila sa kamahinungdanon sa pagpabakuna.

Sa laing bahin, gikatakda sa Hulyo 19, 2021 nga buksan sa kagamhanan sa Dakbayan sa Mandaue ang Park Mall isip vaccination site sa publiko.

Niadtong Huwebes ug kagahapon gipahigayon ang vaccination dry run diin giapilan kini sa mga kawani ug tenant sa maong mall.

Si Dr. Debra Maria Catulong, medical officer sa Mandaue City Health Office nagkanayon nga ang Park Mall sa north reclamation area sa Dakbayan sa Mandaue maoy labing dako nga vaccination center sa siyudad nga mahimong moatiman og 1,200  ngadto sa 1,400 ka tawo sa matag adlaw.

Kini maoy ikalima sa nag-una nga mga vaccination site sa Dakbayan sa Mandaue nga naglakip sa Mandaue City Cultural and Sports Complex sa Sitio Tribunal sa Barangay Centro.

Ang dugang tulo ka UCLM campus new building sa dalan AC. Cortes Avenue sa Barangay Looc, Pacific Mall sa Ibabao Estancia ug J. Center Mall nga makaatiman og 800 ngato sa 1,000 ka tawo sa matag adlaw. (BANAT NEWS)