SOCA ni Mayor Chan nagsentro sa iyang mga proyekto

CEBU, Philippines — Ang kaugmaran sa Lapu-Lapu City Hospital ug uban pang napatuman nga programa ug mga proyekto maoy nahimong sentro sa mensahe ni Mayor Junard Ahong Chan sa iyang  State of the City Address (SOCA) niadtong Huwebes sa hapon, Hulyo 8, 2021.                              

Lakip niini ang health services, tourism, infrastructure, peace and order, environment, social services, disaster and emergency response, COVID-19 vaccination program ug daghan pa. Gihatagan og gibug-aton ni Chan ang pagkahuman sa phase 1 ug Phase 2 sa bag-ong Lapu-Lapu City Hospital diin gibutyag usab niya ang nagpadayon pa nga pag-trabaho sa third phase sa maong tambalanan.  Nunot  niini iyang gihangyo ang mga sakop sa konseho sa dakbayan sa paggahin og salapi alang sa paghuman sa third phase sanglit dili na paigo ang gahin gikan sa Department of Health.                                             

Gipahibawo usab sa mayor ang pag-hire og mga consultant sama sa cardiologist, pulmologist, infectious disease specialist ug emergency medicine specialist sa tuyo nga matubag gilayon ang panginahanglan sa mga pasyente.                                               

Lakip sa gihatagan og pagtagad mao ang pagpalambo usab sa Sta. Rosa Community Hospital aron paghatag og maayong serbisyo sa panglawas sa mga molopyo sa Isla sa Olango.                               

Samtang gilusad ni Mayor Chan ang “learn to earn” free livelihood training alang sa mga asawa nga Oponganon nga nagtinguha nga makabaton og ilang kaugalingong panginabuhian. Ang free training magsugod karong buwan sa Agosto ning tuiga nga molungtad og napulo ka adlaw.  Lakip sa panginabuhian nga ilang pagabansayon mao ang pastry production, dishwashing, soap and powder detergent, reflexology, hairdfressing ug cosmetic. MEL (BANATNEWS)