Vaccination cards sa Cebu City butangan og QR code

CEBU, Philippines — Ang kagamhanan sa Dakbayan sa Sugbo nagbutang og QR codes sa mga vaccination card sa ilang mga konsituwente.

Kaabag nila ang kapolisan niini isip pagpangandam kon maabot na ang panahon nga gamiton ang vaccination card sa nagkadaiyang transaksiyon.

Matud ni Konsehal Dave Tumulak nga kapin na sa 110,000 ka nagpabakuna ang napapitlan na nila og QR codes ang vaccination cards niini.

Adunay kapin sa 1,000 ka indibidwal ang wala pa mahimoi og QR codes ug kasagaran niini health workers nga nalakip sa unang hugna sa pagpamakuna.

Gipasalig ni Tumulak nga hatagan niya og schedule ang maong mga indibidwal alang sa pagkuha sa QR codes niini ug posibleng mahitabo kini sunod semana.

Gibutyag ni Tumulak nga gamit kaayo ang codes tungod kay i-scan ra ang card ug mogawas ang security features sa card holder nga nagpasabot nga original kini.

Gamit usab kaayo ang maong card kon ugaling maimplementar na ang rekomendasyon sa nasudnong Inter-Agency Task Force (IATF) nga magsilbing alternatibo sa travel testing requirement ang vaccination card.

Nanawagan usab siya sa mga tambalanan nga nagpahigayon og pagpamakuna nga ipaambit niini ang data aron mahimoan usab kini og QR codes.

Sa laing bahin, bisan og sunod-sunod ang supply sa COVID-19 vaccines nga niabot sa siyudad apan daghan pa ang naghuwat sa ilang turno nga mabakunahan.

Matud ni Tumulak nga 285,000 ang nagparehistro sa Cebu City ug daghan sa mga residente sa siyudad nga anaa nahisakop sa A4 priority subgroup ang nagpaabot nga sila mabakunahan.

Giawhag ni Tumulak ang employers nga iparehistro ang ilang mga empleyado aron makadawat dayon og mensahe alang sa schedule sa ilang bakuna. —Decemay P. Padilla/BDB (BANATNEWS)