P1.88M nga hazardous waste storage facility giinugurahan
CEBU, Philippines — Giinugurahan diha sa Ricardo Maningo Memorial Hospital (RMMH) sa mga lokal nga opisyal sa Isla sa Camotes ang hazardous waste storage facility.
Ang maong P1.88 milyon nga storage facility maoy labing una sa mga gidumala nga hospital sa Probinsiya sa Sugbo matud ni Dr. Christina Giango, hepe sa Provincial Health Office.
Ang pundo niini naggikan sa Health Facilities Enhancement Program sa Department of Health (DOH).
“Usa man gud ni sa requirement sa Environmental Management Bureau (EMB) nga naa ta ani sa atong mga hospital kay standard man ni siya sa mga hospital. Anhi dinhi i-store ang needles, syringes, gauzes, anything hazardous before kuhaon sa hauler for treatment”, matud ni Giango sa report sa Sugbo News.
Si Giango nagkanayon nga ang tanang gidumala nga tambalanan sa Kapitolyo apil na ang upat ka provincial hospital ug 12 ka district hospital kinahanglan gyud nga mabutangan sa maong pasilidad apan giuna lang usa nila ang sa Camotes tungod kay layo man kini sa sentro.
Ang hauling company na ang mo-operate sa disposal sa hazardous waste human sa treatment.
Si Gobernador Gwendolyn Garcia uban kang Kongresista Duke Frasco sa 5th district, Bokal Red Duterte ug San Francisco Mayor Al Arquillano maoy nangulo sa inugurasyon.
Atol sa maong kalihokan niadtong Hulyo 1, 2021 gianunsiyo ni Garcia nga gitinguha sa Kapitolyo nga ma-upgrade na ang RMMH ngadto sa 100-bed capacity karong tuiga gikan sa kasamtangang 25-bed capacity niini. BDB (BANATNEWS)
- Latest
