Magtiayon gipamusil, asawa patay, Bana Samdan

CEBU, Philippines — Patay ang asawa ug naangol ang bana human sila pamusila sa riding in tandem diha sa Sitio Dagundong, Barangay Panas, Lungsod sa Consolacion niadtong Martes sa hapon.

Si Police Corporal Rechie Gilleran imbestigador sa Consolacion Police Station niila sa namatay nga mao si Rosebilla Tanjay, 60-anyos ug bana niini nga si Rogelio Pepito Tanjay,70, nagpuyo sa maong lugar.

Si Rosebilla nakabaton kini og daghang samad pinusilan sa lawas ug si Rogelio nakabaton usab og samad pinusilan sa tuhod.

Matud ni Gilleran nga diha sa ilang panimalay ang magtiayon diin ang duha ka tawo nga nagsakay og motorsiklo niabot kini.

Giingong ang mga kriminal nangutana una kini asa si Rosebilla ug nikompirma ang biktima nga siya ang ilang gipangita.

Ang mga biktima gipamusil kini sa mga kriminal human sa maong pagkompirma ni Rosebilla.

Human sa maong pagpamusil dali usab nga nipabulhot sa gisakyan nilang motorsiklo ang mga kriminal pahilayo sa lugar.

Pipila ka mga silingan sa mga biktima kinsa nakakita nibutyag nga nagsul-ob og sweaters, ball caps ug nagtabon usab og panapton sa ilang mga nawong ang mga kriminal.

Ang magtiayon daling gidala sa ilang mga silingan diha sa Eversely Child Sanitarium General Hospital sa Barangay Jagobiao, Dakbayan sa Mandaue apan si Rosebilla gideklarar sa mga doktor nga patay na nga nadangat sa tambalanan.

Nakuha sa kapolisan gikan sa lugar nga nahitaboan ang unom ka kabhang sa mga bala sa kalibre .45 nga pistol.

Dugang ni Gilleran nga nagpadayon pa karon sila sa ilang imbestigasyon sa hitabo ug usa sa mga anggulo nga ilang gisubay mao ang panagbangi sa luna sa yuta. —Ariza Rose Miranda/BDB (BANATNEWS)