Operation tuli dili pa itugot sa Cebu City

CEBU, Philippines — Padayong dili motugot ang Cebu City Emergency Operations Center og mga operation tuli karong panahona isip paglikay sa risgo sa pagkuyanap sa COVID-19.

Nasayran nga nahisgotan kini og balik kagahapon human nipagawas og advisory ang Barangay Apas sa Siyudad sa Sugbo pinaagi sa ilang facebook page nga aduna sila’y pagahimuon nga operation tuli sa ilang dapit karong Hulyo 2, 2021.

Dihang nasayod niini ang EOC nagpadala dayon sila og komunikasyon ngadto sa Barangay Apas nga nagpahimagno nga wala pa sila motugot og mga operation tuli karong panahona. Human nipahibawo ang EOC dali nga gitangtang sa Barangay Apas ang ilang advisory nga na-post sa diha sa ilang facebook page.

Matud ni Junard Cabalhin, secretary sa nahisgutang barangay nga ilaha na nga gipadaplin ang maong programa isip pagtuman sa kamandoan sa EOC.

Sayo pa, si Konsehal Joel Garganera, hepe sa EOC nagkanayon nga tumong nila nga masiguro nga luwas ang duha ka habig, ang pasyente ug ang mohimo sa pagpanuli.

Nasayran nga si Garganera nakadawat siya og daghang suwat nga nangutana kon makapahigayon ba sila og mga operation tuli ug iyaha kining gibalibaran.

Dugang ni Garganera nga dili usab angayan i-expose sa daghang tawo ang mga bata. BDB (BANATNEWS)