Cebu City upat ka adlaw na nga wala nakapamakuna

CEBU, Philippines — Wala’y nahitabong pagpamakuna sa siyudad sulod na sa upat ka adlaw human nga wala pay bakuna kontra Corona Virus Disease (COVID)-2019 naabot sa siyudad sa Sugbo.

Matud ni Dr. Jeffrey Ibones, Officer-in-Charge sa Cebu City Health Department ang 5000 doses sa Sinovac vaccines nga gihatag sa Department of Health Central Visayas nahurot na niadto pang adlaw nga Miyerkules sa miaging semana.

Sirado ang lima ka vaccination centers sa Cebu City nga naglangkob sa NOAH Mega Vaccination Center, Robinson’s Galleria, SM Seaside City Cebu, University of Cebu Senior Highschool Building sa J. Alcantara Street sa Barangay Sambag 1 ug Banilad Campus.

Nabalaka si Ibones nga kining paghunong-hunong sa vaccination program moresulta unya nga mawad-an og gana ang katawhan nga magpabakuna.

“Huna-hunaon gud nimo ang Cebu City makabakuna gud og more 4,000 a day kung i-open nato ang lima ka sites dako kaayo na nato nga achievement meaning ang kaigsuonan natong Sugbuanon gusto na gyud sila sa bakuna mao bitaw ironic kaayo magsige ta og ingon pabakuna namo unya ini’g human wala diay tay vaccine,” ni Ibones pa. Sa listahan sa Cebu City Health Department naa na sa 270 mil ang nagparehistro online diin 60 mil niini naa sa A4 priority subgroup.

Dul-an 100 mil na ang nabakunahan sa siyudad wala pa’y labot ang gikan sa Project Balik Buhay(PBB).

Ang Cebu City dunay 25,452 total cases sa COVID-19 human nakatala og 71 ka bag-ong kaso sa COVID-19 ug naa sa 796 ang active cases  niini karon base sa datos sa Department of Health Central Visayas.

Duna sab kini 32 ka dugang  nangaayo apan napun-an og usa ang listahan sa mga nakalas ug niabot na karon og 870.

Sa laing bahin, ang lungsod sa Daanbantayan nipahibalo sa ilang Facebook page nga “zero case na sila sa Covid-19 human kagahapong adlawa wala na silay aktibong kaso sa maong sakit.

Kagahapong adlawa, Hunyo 28, 2021 opisyal ng gideklarar nga nangaayo na ang tulo ka nahibiling aktibong kaso nga silang DB 226, DB 227 ug DB 228.

Ang mga opisyal sa Lungsod kanunay nga mipahimangno sa katawhan nga magmatngon, mag-amping ug magpabilin nga himsog ang panglawas aron malikay sa mga sakit ug nagpasalamat sila sa kooperasyon sa ilang mga konstituwente.— Rowena D. Capistrano/IBM (BANATNEWS)