Flyovers dili sulbad sa trapiko
Cebu, Philippines — Supak si Konsehal Joel Garganera sa nga gipangsugyot nga tukorong dugang mga flyovers sa Department of Public Works and Highways (DPWH) dinhi sa Dakbayan sa Sugbo sanglit para niya dili kini solusyon sa pagsulbad sa problema sa trapiko.
Giuyonan sa konsehal ang baruganan sa University of San Carlos (USC) nga nipadayag nga makaguba sa ‘heritage value’ sa ilang dapit kun madayon ang maong proyekto nga planong tukoron diha sa ilang tungod.
Si Garganera maoy Chairman of Urban Planning sa konseho sa Siyudad sa Sugbo miingon nga usa sa iyang adbokasiya mao ang pagmentinar “culture and heritage” sa siyudad.
Ang DPWH nipahibalo nga magtukod og flyover diha sa N. Bacalso Ave., gikan sa Mambaling flyover padung ngadto sa eskina sa Leon Kilat St. nga dunay gitas-ong nga 1.26 kilometros.
Laing flyover sab nga 1.14 kilometros ang tukoron ipahimutang diha sa P. del Rosario St., nga padung ngadto sa D. Jakosalem St. nga pulos tanan giisip nga makasulbad sa problema sa trapiko sa siyudad.
Apan si Garganera nagkanayon nga kun kini ipadayon maapektahan niini ang implementasyon sa phase 1 sa Bus Rapid Transit (BRT)-Project.
Mas gikinahanglan karon sa siyudad ang mass transportation system, lapad mga dalan, minosan ang gidaghanon sa pribadong sakyanan ug lapad nga traffic system,dugang pa sa konsehal.
“If we allow this flyover to take precedence over the facts that I have mentioned, then there’s no way for us to solve this traffic problem in the city,” panapos pa ni Garganera. (BANAT NEWS)
- Latest
