Daghang pekeng driver’s license ang nasakpan

CEBU, Philippines — Gipangusgan sa Highway Patrol Group (HPG)-7 ang pagbantay sa mga peke nga mga lisensya dinhi sa Sugbo human nga dunay pipila ka motoristang naghupot niini atol sa pagsita diha sa checkpoints. Matod ni Police Captan Cenia, team leader sa HPG sa Lalawigan sa Sugbo, delikado kung dili mabantayan ang paggamit sa mga peke nga mga lisensya tungod kay mamahimo kini nga magamit sa mga krimen.

Ang HPG-7 milusad og gitawag nga One-time, Big-time: Oplan Bitag Sasakyan diin tan-awon ang mga rehistro sa mga motorsiklo o mga sakyanan hasta mga lisensiya.

"Mga fake license maoy rampant nato karon diri sa Cebu, naka confiscate mi diri og suspected fake licenses, pagimbestiga namo sa mga driver, through online ang gahimo sa kuno sa Quezon City," sigun ni Cenia.  Matud pa ID ug biodata ray pangayoon sa mga tighimo aning pekeng lisensiya. Nakigalayon na sila sa Land Transportation Office (LTO) bahin niini.

Pasakaan nila og kasong Falsification of Public Document ug estafa ang nasakmitan og pekeng lisensiya.—IBM (BANATNEWS)