CEBU, Philippines — Butangan og early warning system ang kasapaan sa Dakbayan sa Sugbo aron dali ug sayon nga ma monitor panahon nga mosaka ang tubig sa sapa.
Kini ang plano sa mga sakop sa Cebu City Disaster Risk Reduction and Management Office CCDRRMO sa nagkadaiyang kasapaan sa Cebu City human sa ilang gihimong inspection.
Namatikdan nga sagad sa mga sapa sa Dakbayan ang moawas panahon sa kusog nga bunok sa uwan nga maoy hinungdan sa pagbaha sa nagkalain-laing lugar. Lakip sa ilang lantawon mao ang mga basura nga mobara diha sa kasapaan nga moresulta sa pag-awas. Plano nga ibutang ang early warning system sama sa CCTV, alarm system ug water level detector nga konektado sa command center aron sayon ang pagmonitor.
Apil sa mga lugar nga gisusi sa CCDRRMO mao ang taytayan sa bukiran nga bahin sa siyudad sama sa Butuanon, Lusaran, Pit-os ug mga taytayan sa downtown area sama sa Lahug, Mahiga, Colon ug Bulacao. —MEL (BANATNEWS)