CEBU, Philippines — Gikompirma ni Dr. Jeffrey Ibones, officer-in-charge sa Cebu City Health Department nga niadtong Miyerkules ang Department of Health-7 nihatag sa Cebu City og 5,000 doses sa Sinovac vaccines. Ug posibleng kutob lang sa adlaw’ng Sabado ang maong dugang supply. Ang Dakbayan sa Sugbo nagsugod na kini sa pagbakuna sa mga ubos sa A4 priority subgroup.
Si Ibones nagkanayon nga sa kasamtangan anaa na sa 50,000 ka indibidwal nga ubos sa A4 priority subgroup ang nakarehistro na alang sa inoculation drive. Base sa datos sa Cebu City Health Department 95,000 na ang nabakunahan sa Siyudad sa Sugbo.
Karong adlawa ang Cebu City Health Department mopahigayon og vaccination drive diha sa Barangay Taptap ug ang mga duol nga mga barangay sama sa Pung-ol Sibugay, Sirao ug uban pa ang mahimong moadto sa vaccination center aron mabakunahan.
Nasayran nga 800 ka doses sa Sinovac vaccines ang giandam sa CCHD alang sa mga residente diha sa mga bukirang barangay sa siyudad.
Subay niini, ang Cebu City adunay 25,223 total cases sa COVID-19 lakip niini ang 44 ka bag-ong kaso diin 868 sa maong gidaghanon ang active cases. Ang siyudad adunay 23,611 ka recoveries lakip niini ang 16 nga nadugang ug 868 ang gidaghanon sa nangamatay.
Samtang ang Mandaue City aduna kini 6,847 ka kaso lakip niini ang 10 nga nadugang diin 205 niini ang active cases, 6,412 ang recoveries lakip niini ang 10 usab nga nadugang, 230 ang nangamatay lakip ang upat nga nadugang.
Sa habig sa Lapu-Lapu City adunay 6,767 ka kaso lakip ang 10 nga nadugang, 197 ang active cases, 6,400 ang recoveries lakip niini ang upat nga nadugang ug 170 ang nangamatay.
Ang Central Visayas adunay 69,950 ka kaso, 7,014 ang active cases, 60,748 ang recoveries ug 2,188 ang nangamatay. —BDB (BANATNEWS)