Mga balay gisulod og 12 ka tulisan

CEBU, Philippines — Duha ka panimalay sa Barangay Bato, Dakbayan sa Toledo ang gisulod og 12 ka giingong tulisan lakip niini duha ka babaye niadtong Martes sa gabii apan ang insidente nataho ngadto sa kapolisan kagahapon na sa kadlawon.

Ang mga biktima mao sila si Marvie Montederamos, 31-anyos, adunay kapuyo; Christine Amodia, 34, adunay kapuyo ug Sherilyn Amodia, 27, minyo, parehong residente sa maong lugar.

Ang giingong 12 ka nahisgutang tulisan kinsa nagsul-ob og bonnet aron matago ang ilang mga dagway ang padayong gipangita sa kapolisan.

Si Police Staff Sergeant Alfredo De Graci Jr. nagkanayon nga ang unang balay nga gisulod sa usa sa mga tulisan mao ang gipuy-an ni Montederamos.

Ang maong tulisan giingong nimando sa biktima sa pag-abli sa pultahan sa ilang balay.

Giingong daling gikuha sa tulisan ang shoulder bag sa biktima nga adunay sulod nga P200.

Gikan sa ilang Montederamos ang maong mga tulisan nipaingon kini sa panimalay nila ni Amodia diin gimandoan usab nila ang mga biktima nga ablihan ang pultahan.

Giingong ang mga biktima gihulga sa mga tulisan nga pusilon kong dili ablihan ang pultahan sa balay.

Ang mga biktima nagdumili sa pag-abli sa pultahan hinungdan nga gipugos sa pag-abli sa mga tulisan ang screen sa sliding window sa balay.

Dihang nakasulod ang usa sa mga tulisan sa balay giablihan niini ang main door ug daling nisulod ang mga kauban niini ug gipangkuha ang mga butang diha sa sulod sa balay.

Ang mga tulisan nanghulga kini sa mga biktima ug usa kanila ang nihapak sa armas ngadto sa ulo ni Christine.

Ang mga tulisan nilibot kini sa panimalay sa biktima aron masusi ang mga butang nga ilang madala ug mapahimuslan.

Nadala sa mga tulisan ang mga cellphone ug alahas sa mga biktima.

Human sa pagkuha sa mga butang sa mga biktima ang mga tulisan daling nibiya sa lugar sakay sa tulo ka scooter padulong sa national highway. —BDB (BANATNEWS)