20,800 doses sa Sinovac vaccines niabot sa Sugbo
CEBU, Philippines — Gipahibawo ni Dr. Van Phillip Baton, vaccination spokesperson sa Department of Health-7 nga kagahapon sa buntag 20,800 doses sa Sinovac vaccines ang niabot sa Sugbo ug gi-apod-apod kini sa mga lugar nga sakop sa Metro Cebu.
Sayo pa, pipila sa mga local government unit sama sa Cebu City ug Talisay City ang temporaryo nga nihunong sa ilang pagpamakuna tungod kay nahutdan og supply sa bakuna.
Matud ni Baton kagahapon nga nipadala sila og 5,000 doses nga bakuna sa Cebu City ug 4,000 doses sa Dakbayan sa Talisay diin gikuha kini gikan sa 20,800 doses Sinovac vaccines nga niabot kagahapon aron mapadayon ang ilang pagpamakuna.
Adunay 10,000 ka doses usab sa Sinovac vaccine ang gipadala ngadto sa Negros Oriental kagahapon.
Gibutyag ni Baton nga dugang supply sa mga bakuna gikan sa Manila ang gipaabot usab nila nga madawat.
Sukad niadtong buwan sa Marso niining tuiga hangtud kagahapon ang Central Visayas nakadawat na og 783,7 doses gikan kini sa upat ka brand sa bakuna nga gilangkuban sa Pfizer BioNTech, Sinovac, AstraZeneca ug Sputnik V.
Sa laing bahin, niabot ngadto sa 119 ka sakop sa Cebu Port Authority ang nagpabakuna batok sa COVID-19 kagahapon sa Project Balik Buhay nga nahimutang sa International Eucharistic Congress, Dakbayan sa Sugbo.
Matud ni Maryknoll Lague, public relations officer sa CPA nga mga trabahante nga ubos sa A4 category ang gipangbakunahan kagahapon.
Ug sa unang batch 23 kabuok ang nagpabakuna kinsa adunay mga comorbidity.
Samtang sa Dakbayan sa Talisay daghan na nga Talisaynon ang gustong magpabakuna diin uban kanila apurado na kini sa ilang schedule.
Si Mayor Gerald Anthony “Samsam” Gullas Jr. nihangyo sa mga Talisaynon nga patas-an ang ilang pasensiya tungod kay menos pa ang supply sa bakuna nga naa kanila.
Gani, giundang ang pagdawat og walk-in nga magpabakuna aron ilang masiguro ang mga nakarehistro. —Rowena D. Capistrano, Gabriel C. Bonjoc/BDB (BANATNEWS)
- Latest
