Rama nimando sa pag-ayo sa karsada sa inayawan
CEBU, Philippines — Nimando na si Cebu City Acting Mayor Michael Rama alang sa dinalian nga pagpaayo sa nangaguba nga dalan duol sa transfer station sa mga basura diha sa Barangay Inayawan.
Ang maong problema nakita mismo ni Rama atol sa iyang pagbisita kagahapon sa maong dapit. "Mura’g walay gobyerno didto," suma pa niya.
Una na nga niulbo ang isyu kalabot sa taas nga linya sa mga barangay garbage truck diha sa Inayawan human wala na kini dawata didto sa Landfill sa Barangay Binaliw.
Adunay mitumaw nga taho nga duna pay naka-pending nga bayranan ang kontraktor sa transfer station ngadto sa kompanya nga nag-operate sa landfill sa Binaliw.
Giingong usa kini sa rason nga nagtipun-ok ang mga basurahan diha sa transfer station sa Inayawan. Hinuon wala pa motingog kalabot niini ang kagamhanan.
Una na nga nialma ang kapitan sa Inayawan nga si Kirk Bryan Repollo kalabot sa sitwasyon sa iyang barangay ilabi na sa kagubaon sa mga dalan sa ilang dapit.
Matud pa ni Repollo nga nakadungog siya og taho nga nagkulang na ang pundo sa kagamhanan alang sa transfer station.
“Basta basura na gani ang hisgotan, ang Barangay Inayawan gayud ang perming apektado pero wala kini hatagi og dakong gibug-aton sa nagdumala sa Dakbayan sa Sugbo,” suma pa ni Repollo. —MEL (BANATNEWS)
- Latest
