CEBU, Philippines — Nanawagan karon ang Presidente sa Liga ng mga Barangay – Cebu City Chapter nga si Franklyn Ong ngadto sa ubang mga personnel sa Mayor’s Information Liaison Officers (MILO) nga unta mohimo pud sila og koordinasyon ngadto sa mga barangay aron makabaton og tulin o mga hiniusang programa.
Matud pa ni Ong nga duna siyay nadunggan nga ang ubang barangay naproblema sa maong sitwasyon sanglit nag-iyahay ra sa paghatag og serbisyo ang MILO ug barangay nga walay koordinasyon.
Dunay mga higayon nga nakamugna kini og kagubot.
“Maghiusa ta sa pagtrabaho, kay ang maka-benefit niini kay ang katawhan raman pud. Magtinabangay lang gud ta,, ” suma pa ni Ong sa dihang nahinabi sa mga sakop sa media atol sa assembly sa ABC-Cebu City Chapter.
Usa sa nireklamo sa presensya sa MILO mao ang kapitan sa Barangay Inayawan nga si Kirk Bryan Repollo gumikan kay base sa iyang obserbasyon, wala gyud naglihok ang MILO sa ilang lugar ug nasapawan napud ang trabaho sa ilang Barangay Environmental Officers (BEO) nga matud pa wala gyud hatagi og katungod nga maka-isyu og citation tickets sa mga magpataka og labay sa basura.
Nasayran nga kaalyado si Repollo sa grupo ni kanhi Mayor Tomas Osmeña nga Bando Osmeña Pundok Kauswagan (BOPK).
Ang mga barangay nga dili kaalyado sa administrasyon maoy mga lugar nga gibutangan og MILO. MEL (BANATNEWS)