Politika sa Talisay wa pay kisaw

CEBU, Philippines — Human nipadayag si Bise mayor Alan Bucao nga magpabilin siya sa grupo sa Alayon wa nay kisaw sa politika ang Dakbayan sa Talisay.

Apan iyang gipadayag nga nag iyahay lang og paniid ang mga politiko karong panahona samtang nagkaduol na ang pagduso sa sertipiko de kandidatura.

Una niini, nadungog niadtong miaging buwan nga si Bucao modagan pagkamayor.

Apan giklaro sa bise mayor nga magpabilin siya sa Alayon sa posisyon nga bise mayor.

Si Mayor Gerald Anthony “Samsam” Gullas naa pa sa iyang unang termino pagkamayor pero mobalik siya sa pagkakongresista sa unang distrito sa sunod tuig nga piniliay. Ang iyang asawa nga si Rhea maoy magpapili pagkamayor sa Syudad sa Talisay nga nauyonan sa mayoriya sa mga kapitan.

Gani ang asawa sa mayor naghinay-hinay na sa pagpakita sa mga tawo pinaagi sa pagtabang sa pagpromote sa mga produkto sa mga bag-ong negosyante sa siyudad.

Samtang ang grupo sa oposiyon way tingog hangtud karong panahona. MEL (BANATNEWS)