Mga kawani sa Cebu City Hall kinahanglang magpabakuna
CEBU, Philippines — Gisugyot ni acting Mayor Michael Rama ngadto sa management sa NOAH (New Normal Oasis for Adaptation and a Home) Complex sa South Road Properties nga sa maong pasilidad bakunahan ang liboan ka mga empleyado sa Cebu City Hall ingon man usab ang opisyales sa barangay.
Hinuon giagad pa ang torno sa matag kategoriya ingon man usab sa supply sa bakuna. Suma pa ni Rama nga nag-estoryahanay na sila ni Association of Barangay Councils (ABC) -Cebu City Presidente Franklyn Ong kalabot niini.
Kagahapon sa buntag, giawhag ni Rama ang mga empleyado nga magpabakuna gyud.
Sa laing bahin, niabot na sa 86, 416 ka mga indibidwal sa Cebu City ang nakapaturok na sa ilang bakuna batok COVID-19.
Mao kini ang datos gikan sa Cebu City Vaccination Operations Center (VOC) gikan niadtong Marso 24, 2021 hangtod kagahapon, Hunyo 21.Ang vaccination sites sa siyudad nahimutang sa Robinsons Galleria, SM Seaside City Cebu, University of Cebu SHS Campus, J. Alcantara St., University of Cebu SHS Department, Banilad ug NOAH Complex.
Sa pikas bahin, 46 na ka mga bombero sa Cebu City Fire Office ang nakapabakuna batok Covid-19 matud pa sa ilang tigpamaba nga si Senior Fire Officer 1 Wendel Villanueva.
Sagad kanila kadtong naapil sa A2 ug A3 category nga edad-edaran na ug dunay comorbidities. Ang bakuna gigamit kanila Pfizer BioNTech, Aztrazenaca, Sputnik V ug Sinovac.
Nanghinaut si Villanueva nga mabakunahan silang tanan sa buwan sa Hulyo apan samtang wala pa kini nahitabo, magpadayon sila sa ilang adbokasiya nga ‘You stay away from us, we stay away from you.’ “Di ta mokompiyansa, daghan na tuod ang nabakunahan but bisan pa gani og nabakunahan pwede gihapon ta mataptapn og COVID so during firefighting operation palayo gyud sa responders, pasagdahi mi motrabaho sa among trabaho, hakot lang mo sa inyong butang ayaw lang mo pagbira og hose, ay lang mo og tabang namo kay kaya ra namo among trabaho,” sigon ni SFO1 Villanueva.— Decemay P. Padilla/IBM (BANATNEWS)
- Latest