Ekslusibong Bar gironda, 122 sikop

CEBU, Philippines — Usa ka sikat nga bar ang gironda sa Cebu City Police Office (CCPO) subay sa ilang Oplan Bulabog tungod sa paglapas sa minimum health protocols ug curfew sa mga parokyano niini niadtong Domingo sa gabii diha sa Barangay Luz.

Ang hepe sa Cebu City Intelligence Unit nga si Police Lt. Colonel Randy Caballes nag-ingon nga nakadawat sila og sumbong nga ang maong bar wala na mosunod sa social distancing ug nakalapas sa curfew.

Ang nahisgotan nga bar nga Verified Lounge nga nahimutang sa roof deck sa Avenir Bldg. sa Barangay Luz kanunay nga adtuon og mga high-profile personalities ug mga VIPs dinhi sa Sugbo. Matud pa ni Caballes ang uban kanila moagi pa og online booking.

Moabot 122 ka kustomer ang gisikop ug gidala sa Prevention, Restoration, Order, Beautification and Enhancement (PROBE).

“Puno gyud kaayo, overcrowded gyud kaayo ang area,” matud pa ni Caballes sa mga tigbalita.

“Ang report nga mag sigeg tawag sa office ni CD,kini nga bar sayo ni sila mag open until 3 a.m, 2 a.m., then grabe kaayo sila’g dawat og customer wala na gi follow ang 50 percent (capacity),ang ilaha full package gyud, puno gyud,”dugang niya.

Ang mao nga bar anaa nahimutang sa rooftop sa usa ka building sa Barangay Luz, Cebu City diin nahibaw-an nga dugay na nga nag-operate.

Matud pa ni Caballes, usa ka concerned citizen ang mitawag sa CCPO sulod na sa duha ka semana nga mi-report bahin sa operasyon sa maong bar.

Ang pulisya mohimo og report nga isumite nila sa Business Permit and Licensing Office (BPLO). Ang maong buhatan na maoy modesisyon kun unsay silot ang ipahamtang sa tagiya sa maong bar.

Sa pagkakaron, gibutyag ni Caballes nga gawas sa nasangpit nga bar, pipila pa ka mga establisemento nga nakalapas sa mga minimum health standard protocols ang ila sab gi-monitor.

Tungod kay adunay kapabilidad ang kapolisan nga morekomenda og dugang nga aksyon kontra sa mga establisamentong malapason possible nga irekomendar nila pasirad-an kini.

“Hopefully mu cooperate sila sa mga pulis if naa silay makita nga mga bars nga nag open beyond sa curfew hours and makita nila nga daghan og violation, pwede nila ma-report sa nearest police station para ma aksyonan,”matud ni Caballes.

“Dugay nami ga monitor ani nila, lisud masakpan kay naa sa roof deck, padulong pa lang saka ang mga police, mahipos na ug manago ang mga customers sa fire exit. For a time they’ve been successful in evading our enforcers, there is always a time for everything but this time, it’s a time for them to face the consequence of their actions,” si Emergency Operations Center deputy implementer Konsehal Joel Garganera nagkanayon.

“The management will be served show-cause order but automatically their Permit to serve liquor will be suspended pending investigation.  Considering the gravity of their blatant violations of our existing EO’s, we might endorse for the revocation of their liquor permit. This will served as a lesson to all who disregard our safety in this pandemic,” dugang pa ni Garganera.

 Nasayran nga gawas sa maong bar, duna say laing establisamento ang gironda sa nagkadaiyang police stations anang gabhiuna nga niresulta sa pagkasikop sa dugang 100 ka mga nakalapas sa health protocols. —Decemay Padilla/IBM (BANATNEWS)