Dizon misugyot pag-establisar og telemedicine

CEBU, Philippines — Gisugyot ni Cebu City Councilor Alvin Dizon ang usa ka ordinansa nga mag-establisar og telemedicine services sa Cebu City Medical Center (CCMC) ug City Health Department (CHD).

Ang maong sugyot nga giulohan og “Telemedicine Services Ordinance giduso sa Committee on Laws, Ordinances, and Styling alang sa pagsusi.

Tumong sa maong sistema sa telemedicine services aron paggamit pag-ayo ang teknolohiya sa mga healthcare setting.

Lakip sa tuyo niini mao nga makakonektar ang mga health care providers sa mga residente sa syudad labi na sa mga nahimutang sa suok nga komunidad ug kadtong dili makaya ang serbisyo sa usa ka pribado nga mga healthcare institutions.

Nalatid usab niini nga ang syudad kinahanglan mohatag og pamaagi aron makab-ot ang maong serbisyo pinaagi sa paghatag og suporta sa medical equipment ug uban pa.

Ang comprehensive public education campaigns hiniusang himuon sa CCMC ug CHD sa koordinasyon sa Public Information Office aron mag-promote og awareness kabahin sa telemedicine.

Sa higayon nga maaprubahan, itagana ang gahin nga mokabat sa P5 milyones nga magamit matag tuig alang sa pagpatuman niini. MEL (BANATNEWS)