Pagmonitor sa giibot nga mga kahoy giduso sa konseho

CEBU, Philippines — Giawhag sa konseho sa Siyudad sa Sugbo ang Cebu City Environment and Natural Resources Office (CCENRO) nga moumol og report ingon man usab pag-monitor sa tanang kahoy nga gipang-ibot sa mga lugar ug kun diin kini gibalhin.

Lakip sa ilang pangayuon ang report kabahin niini gikan niadtong buwan sa Enero ning tuiga.

Si Konsehal Joel Garganera maoy nangamahan sa maong resolusyon ug giaprobahan dayon kini sa konseho sa siyudad.

Nasayran nga nahimo na nga pamaagi ang pagtangtang sa kahoy nga dili maguba ang “historical value” niini kun ang gitawag og earth balling ug ibalhin kini sa laing lokasyon.

Nagkanayon si Garganera nga importante ang pag-monitor sa gipangtang nga kahoy aron maseguro nga maatiman kini og tarong ilabi na sa proteksyon niini.  Kahinumdoman nga niadtong Marso, niduso usab og ordinansahon si Garganera nga dunay kalabotan sa earth balling sa mga kahoy diin naghisgot kini sa mga saktong pamaagi o proseso sa pagbuhat sa maong butang ug uban pa nga regulasyon.

“It is imperative for the CCENRO to submit an updated report on the status of the earth balled trees, the location where they are transferred and the monitored deaths of the said trees in aid of legislation of the abovementioned ordinance,” matud pa sa konsehal. —MEL (BANATNEWS)