69 ka motor nga na-impound gidispatsar sa kapolisan
CEBU, Philippines — Moabot sa 69 ka mga motorsiklo nga wala na gitagad sa mga tag-iya ang gidispatsar sa kapulisan sa Dakbayan sa Talisay.
Kini human nagdasok na kini sa ilang buhatan tungod kay wa kuhaa sa mga tag-iya niini.
Si Police Lt. Roberto Barnido Jr., deputy sa Talisay City Police Station niingon nga ang mga motorsiklo nga na impound mao ang mga motorsiklo nga gigamit sa mga kriminal o mga nadakpan gumikan sa kakuwang sa dokumento ug uban pa.
Niadtong miaging adlaw, nahatud na ang 52 ka motorsiklo didto sa Dakbayan sa Bogo nga maoy butanganan sa na impound nga motorsiklo nga nadakpan sa kapulisan.
Apan aduna pa’y 17 kabuok nga ighahatud, samtang suma pa ni Barnido nga kadtong mga bag-o pa nga nadakpan o na impound ila pang gitagaan og panahon ang mga tag-iya sa paglukat niini.
Gibana-bana nga moabot sa 30 ka buok motorsiklo ang nadugang sa na-impound sa kapolisan.
Ang gustong mokuha sa motorsiklo mahimong moduol sa buhatan sa kapulisan ug dad-on ang mga dokumento nga magmatuod nga sila ang tag-iya niini. —MEL (BANATNEWS)
- Latest
