Isyu sa modernisasyon sa Carbon Public Market nagpadayon

CEBU, Philippines — Ang Megawide Construction Corp. dili mohunong sa paghatag og katin-awan sa mga isyu nga gibato kanila kalabot sa modernong Carbon Market bisan pa nga ang uban niini gibalik-balik na.

Gihimakak ni Louie Ferrer, chief corporate affairs and branding officer sa Megawide  ang isyu nga giingong pasakaan nila ang renta.

Matud ni Ferrer nga magpabilin gihapon kini nga P8.50 per square meter ang abangan ug kon anaa man gani pagsaka nga mahitabo mag-agi pa kini og konsultasyon sa vendors ug nanginahanglan kini og approval sa local government unit.

Gibutyag ni Ferrer nga i-revive nila ang Freedom Park nga mas attractive ug imentinar ang heritage value niini.

Gihimakak usab nila ang taho nga wala sila’y gibuhat nga mga konsultasyon sa maong proyekto ug matud usab niya nga tuig 2019 pa gisugdan nila ang mga konsultasyon.

Nasayran nga giproseso na ang mga permit ug clearance alang sa construction sa proyekto nga posibleng sugdan sulod karong buwana.

Sa dili pa matapos karong tuiga ma-establisar na ang area ang Puso Village, interim market, Sto. Niño chapel, ug dakong parkingan sa mga sakyanan. BDB (BANATNEWS)