P1M shabu nasakmit

CEBU, Philippines — Mokabat  sa  P1 milyon nga kantidad sa gituohang shabu ang nasakmit sa mga sakop sa Lapu-Lapu City Police Office (LCPO) gikan sa gihulagway nga high value target diha sa taga Barangay San Nicolas sa Dakbayan sa Sugbo.

Si  Police Lieutenant Noah Añana  nga ubos sa kamandoan sa hepe sa City Intelligence Unit (CIU) sa LCPO nga si Police Major Joey Vicoy maoy nangulo sa buy bust operation diha sa PUJ Terminal sa Barangay Pajo sa maong dakbayan sayo niadtong Lunes sa buntag, Hunyo 14, 2021.

Ang nadakpan mao si Emmanuel Hugo Pastrano, 40, taga San Nicolas sa Dakbayan sa Sugbo nga matud pa anha sa maong terminal namaligya og ilegal nga drugas hinungdan sa gilusad nga operasyon nga nakaingon sa pagkasikop niini. 

Sa laing bahin, gikatakdang ablihan sa sunod buwan sa Siyudad sa Sugbo ang Balay Silangan nga usa ka temporary reformatory  facility alang niadtong mga gagmay’ng drug pushers o street pushers nga gustong magbag-o.

“Mao kining mga tawhana nga naapil sa watchlists nga wala pa nakasohan , ug gusto nila nga mag-usab na sila sa ilang kinabuhi. Sa Balay Silangan, kay alang ra gyud sa pushers,” suma pa sa  pangulo sa City Office for Substance Abuse Prevention (COSAP) Jonah John Rodriguez.

Ang edipisyo sa Cebu City Resources Management and Development Center (CREMDEC) diha sa Barangay Taptap maoy ilang gamiton para niini. Giingong molanat tulo ngadto sa lima ka buwan ang programa.

Kasamtangang giproseso sa kagamhanan ang dokumento alang sa konstruksyon sa permanenteng pasilidad alang niini nga anha tukoron sa Barangay Guba.— Sanden J. Anadia/IBM (BANATNEWS)