Pag-hire og Job Order employees pamenusan
CEBU, Philippines — Nagkatinubagay sila si Konsehal Niña Mabatid ug Konsehal Alvin Dizon kabahin sa sugyot sa naulahi nga menusan ang gidaghanon sa gipang-hire nga job order employees sa siyudad.
Sa iyang social media post gihagit ni Mabatid si Dizon pagsuroy sa city hall ug sa kabarangayan aron makita kun unsa kahago ang mga JOs ilabi na kadtong gihimo nga frontliners batok sa Covid-19, ang uban walay klaro ang sweldo.
Gikwestyon ni Mabatid nganong buot ni Dizon ipa-divert ang budget sa suholan sa JOs pagpalit og mga tambal, livelihood ug burial assistance nga aduna man kini kaugalingong pundo ug nganung hatagan og importansya ang patay unya ang buhi paantoson.
Apan si Dizon miingon nga sugyot ra ang iyang rekomendasyon ngadto sa committee on budget and finance ug sa mga department heads.
Nitambong ang mga department heads sa sesyon nga gihimo apan matud ni Dizon wala si Mabatid anang tungora. Gipadayag ni Dizon nga wala siya namolitika sa iyang sugyot.
Si Dizon, niawhag ni Mabatid nga motambong sa sunod nga budget hearings.— Rowena D. Capistrano/IBM (BANATNEWS)
- Latest