300 ka tawo makadawat sa Sputnik V vaccine
CEBU, Philippines — Si Russian Ambassador Marat Pavlov nagkanayon nga andam tabangan sa Russia ang Pilipinas ilabi na sa supply sa bakuna batok sa COVID-19 apan angayan usab sabton nga kinahanglan nila nga unahon ang ilahang katawhan nga mabakunahan.
Sayo pa, ang Pilipinas nakadawat kini og supply sa Sputnik V vaccines diin usa ang Cebu City sa nahatagan og 300 doses sa maong bakuna.
Matud ni Pavlov nga ang Sputnik V luwas ug efficient ug giaprobahan kini sa 67 ka nasud.
Samtang si Dr. Jeffrey Ibones, officer-in-charge sa Cebu City Health Department nipahibawo nga karong hapon ipahigayon ang inoculation sa Sputnik V vaccines gikan sa Russia ug anha kini ipahigayon sa University og Cebu Senior High School building sa J. Alcantara, Barangay Sambag 1, niining siyudad.
Giingong ang usa ka vial sa Sputnik V, usa usab ka tawo ang makadawat niini.
Nasayran usab nga random ang pagpili sa makadawat sa Sputnik V vaccines gikan sa mga A1 hangtud sa A4 category, ang mga makadawt niini gipahibawo sa unsa nga brand sa bakuna ang itusok sa kanila aron kon dili mosugot makabalibad daan ug makapili og lain nga hatagan.
Sa laing bahin, gilakip na karon sa kagamhanan sa Dakbayan sa Lapu-Lapu sa master list ang 3-anyos nga mga bata alang sa nagpadayon nilang vaccination drive batok sa COVID-19.
Kini ang gikompirmar ni Dr. Agnes Realiza, pangulo sa Lapu-Lapu City Health Department.
"Para mausa na lang sila. Para kong naa na’y bakuna para nila, at least naa na ta’y master list nila”, pasabot ni Realiza.
Gikataho nga ang naghimo na ang nasud sa China og clinical trial alang sa Sinovac vaccine sa pagsuta kon magamit ba usab kini sa 3-anyos nga mga bata ug mga 17- anyos sa ilang dapit.Gawas niini, niadtong Mayo 27, 2021 ang Estados Unidos nihatag na usab og pagtugot sa paggamit sa Pfizer vaccine alang ngadto sa mga 12 ngadto sa 15-anyos nga mga bata.
Samtang sa Dakbayan sa Talisay, si Dr. Cesar Rey Bautista sa Talisay City Health Office nibutyag nga kaya nila nga hutdon ang bakuna tungod kay daghan na ang nagpalista kanila.
Apan hangtud karon wa pa sila’y nadawat nga bakuna bisan pa sa ilang hangyo nga mahatagan na og laing mga bakuna. —Romeo T. Limpangog, Gabriel C. Bonjoc/BDB (BANATNEWS)
- Latest