Brgy Zapatera makig-alayon sa COSAP sa pakigbatok sa droga

CEBU, Philippines — Kapitan Francisco Benedicto sa Barangay Zapatera, mipasalig nga makig-alayon sila karon sa Cebu City Office for Substance Abuse and Prevention kon COSAP, human usa sila sa tulo ka mga barangay sa Dakbayan sa Sugbo nga giingong dili aktibo sa Community Based Drug Rehab Program.

Kini sa tuyo nga maabagan sila sa pagpakigbatok sa illegal nga drugas sa ilang barangay.

Gitataw ni Benedicto nga dili tinuod nga nagpabaya ang Barangay Zapatera sa kampanya kontra droga, tungod kay kanunay ang ilang monthly meeting sa BADAC nga gitambongan sa mga sakop sa Parian Police Station.

Nakighinabi na usab siya sa opisyal sa DILG may kalabutan sa kahimtang sa ilang barangay.

Gitug-an ni Benedicto nga walay pusher sa ilang barangay, apan aduna pipila ka user nga adto mogamit sa gawas sa ilang barangay, gawas niini aduna silay napanid-an nga mga bag-ong nagpuyo nga kadudahan ug mga lihok.

Samtang ang mga drug users nga nahiuli na sa ilang panimay sa Barangay Zapatera pinaagi sa plea bargaining agreement maoy gidapit nga motambong sa BADAC meeting matag bulan. MEL (BANATNEWS)