Caindec nipasaka og kaso batok sa motorcycle dealers

CEBU, Philippines — Si Land Transportation Office (LTO-7) Regional Director Victor Emmanuel Caindec nipasaka og kasong cyber libel batok sa lima ka mga korporasyon nga gipanag-iya sa Du Family nga naglangkob sa Du Ek Sam Inc; Des Marketing Inc; Des Strong Motors Inc; Desk Mark Corp ug Premio tungod sa matud pa dili makiangayong pasangil batok kaniya nga nangayo siya og tag P500 nga “SOP” matag transaksyon sa mga rehistro sa motor.

Si Atty. Ben Cabrido, kinsa maoy Legal Counsel ni Caindec, nipakita sa mga tigbalita sa ilang kopya sa mga kasong gipasaka sa Mandaue City Prosecutors Office kagahapong adlawa.

Matud pa ni Cabrido, kasong paglapas sa Sec 4 (C) (4) sa Republic Act 10175 o Cybercrime Prevention Act of 2012 batok sa maong mga kompanya tungod nakita nila nga malisyoso ang giluwatan nga opisyal nga pamahayag sa maong mga korporasyon batok kang Caindec.

Si Cabrido, nitug-an napulo ka counts sa cyber libel ang ilang giduso batok sa lima.

Si Cabrido miingon nga kung gustong mangwarta si Caindec nganong hangtud karon nagpabilin pa gihapon kining direktor sa LTO-7. Ug kun tinuod nga dunay padangog sa LTO-7 mas maayong mohimo ang NBI-7 og imbestigasyon kun kinsa ni sila tungod kay nasayod siya nga dili kini binuhatan sa iyang kliyente.

Si Caindec namahayag nga magpadayon siya paggukod aning dealers nga namintaha sa ilang mga customer ilabi na karon nga panahon sa pandemiya.

Ang iyang gipasabot mao kadtong mga nakapalit og motor nga napalta sa pagbayad kay naglisod dala aning pandemiya apan giembargohan gihapon sa ilang hinagoang motor.  Gibutyag ni Caindec, base sa datus dunay 67 porsiyento sa12.77 milyones nga dunay motor sa tibuok Pilipinas ang wala narehistro.

Ang Banat News padayon nangita og pamaagi aron makakuha og pamahayag gikan sa maong mga korporasyon atol ning pagbalita.— IBM (BANATNEWS)