Nakatabang sa pakigbatok sa COVID-19 maisip nga “bag-ong bayani”

CEBU, Philippines — Gitawag ni Cebu City Councilor Philip Zafra nga “bag-ong bayani” ang tanang tawo ug institusyon nga daku og natabang sa pakigbatok sa COVID-19 ug kini angay nga tagaan ug pasidungog atol sa pagsaulog sa Siyudad sa ika-123 nga Adlaw sa Kagawasan sa Pilipinas karong Sabado Hunyo 12, 2021.

Sa iyang privilege speech sa kataposang sesyon sa Sangguniang Panlungsod siya nagkanayon, kining mga “bag-ong bayani” angayan nga dayegon sa ilang talagsaong hiyas ug sakripisyo.

Lakip sa hatagan sa maong pag-ila mao ang tanan nga mga trabahante sa kahimsog nga nanguna sa pakigbatok sa COVID-19, ang Philippine National Police, Task Force Kasaligan, AMRO ug ERUF.

Wala usab gikalimtan ni Zafra si DENR Secretary Roy Cimatu nga gipadala ni Presidente Rodrigo Roa Duterte dinhi sa Sugbo aron bantayan ang kahimtang sa COVID-19, ug ingon man ang kauban niini ang chief implementer for the Visays sa IATF nga si ret. Major General Melquiades Feliciano.

Giila usab niya si Konsehal Joel Garganera sa tanang gibuhat niini isip Deputy chief implementer sa Emergency Operations Center ug ingon man ang tanang myembro sa EOC, mga opisyal sa barangay nga gipanguluhan sa mga kapitan.

Gipasalamatan usab ni  Zafra ang mga pribadong indibidwal nga nagtugot sa paggamit sa ilang pribado nga kabtangan isip isolation center lakip na si Michael Gleissner sa Big Foot Studios alang sa katukuran sa Noah Complex ug Project Balik Buhay alang sa Bayanihan Field Centers 1 ug II.

Giduso usab ni Zafra ang pag-ila ni Atty. Augusto Go kauban ang mga nagdumala sa SM ug Robinsons alang sa pagtugot sa ilang mga lugar nga magamit isip vaccination site. MEL (BANATNEWS)