Footbridge nga nagdugtong sa Ermita ug Pasil ayuhon

CEBU, Philippines — Gihangyo ni Ermita Barangay Captain Mark Miral ang kagamhanan sa Siyudad nga i-sumpay pag-usab ang footbridge nga nagsilbing access road sa mga responders ug mga residente sa Ermita ug Pasil.

Si Miral sa pakighinabi sa The Freeman, miingon nga ang nahisgutang footbridge dunay kakulangan pagkahuman sa rehabilitasyon sa Guadalupe River.

“Wala na siya maguba apan tungud kay gipalapdan man ang Guadalupe River para sa flood control, mao nga nakulangan na siya karon,” ingon ni Miral.

Nagkanayon si Miral nga mohimo pa sila og resolusyon kalabot niini aron masusi na sa taga Department of Engineering and Public Works.

Bisan kung wala ang resolusyon, ang chairman sa Siyudad sa komite sa mga proyekto sa imprastraktura ug pagpugong sa baha, nga si konsehal Jerry Guardo, naghimo na sa iyang inisyal nga pagsusi sa lugar ug miingon nga ila kining ayohon.

Suma pa ni Guardo nga tungod sa paglapad sa suba na karon, unom hangtod walo ka metro nga gintang sa footbridge ang nakita ug kinahanglan nga mahatagan dayon ug solusyon.

“Nakasabot ko sa kabalaka ni Kap Miral ug sa mga residente. Tuyok na kaayo ang mga residente, musakay pa sila kung wala ang foot bridge. Piligro pud kaayo kung mulabang sila sa sapa,” ingon ni Guardo.

Gipasalig ni Guardo nga kini maaksyunan dayon tungod kay aprubado na kini ni Cebu City Mayor Edgardo Labella.

“Magpa tawag unya ko ug meeting sa taga DPWH, DEPW arun sa pag himo ug Program of Work and Estimate (POWE) sa mao nga proyekto ug ang pag recover sa 3 metro nga dalan sa Road Right of Way daplin sa Sapa,” segun ni Guardo. MEL (BANATNEWS)