Nadugta sa sulod sa elevator
CEBU, Philippines — Tungod sa hilabihan ka kalangsi nga baho gikan sa usa ka guba nga elevator diha sa abandonadlo na nga Cebu International Convention Center (CICC) sa Dakbayan sa Mandaue nadiskubrehan nga duna diay patay'ng lawas sa usa ka tawo sa sud niini.
Si Police Major Eric Gingoyon, hepe sa Police Station 1 sa Mandaue City Police Office (MCPO) ang maong patay'ng lawas giila nga mao si Arjon Canangga, 33, kinsa giingong tulo na ka adlaw nga gipangita sa mga kabanay.
Si Gingoyon miingon nga ang namatay nagpuyo sa Sitio Basubas sa Barangay Tipolo sa Dakbayan sa Mandaue uban sa iyang kapuyo nga babaye ug lima nila ka mga anak.
Alas-9 sa buntag sa miaging adlaw nakaplagan ang lawas ni Canangga sa dihang gisusi sa mga tawo kun diin nagagikan ang nangalisbong baho.
Ang ig-agaw sa namatay nga si Anna Mae Dejito miingon nga tulo na ka adlaw dihang kataposan nilang nakita si Canangga nga nagsakay og bisikleta padulong mopalit og sigarilyo.
Gisusi pa karon sa kapolisan kun nganong naabot sa maong abandonadong edipisyo si Canangga ug kun unsay hinungdan sa kamatayon niini o kun duna bay foul play.Ang kapuyo sa namatay nga si Rey-ann Quiadahon maoy ni-claim sa maong patay'ng lawas ug kini mipadayag nga dili na niini gustong ipaubos sa otopsiya ang patay’ng lawa sa kapuyo. —IBM (BANATNEWS)
- Latest