Mga barangay sa probinsiya gipangbahaan

CEBU, Philippines — Ang Cebu City nga gipaubos sa signal no.1 gumikan sa Bagyong Dante menos ra ang kadaot nga naangkon sa siyudad base sa report sa Cebu City Disaster Risk Reduction Management Office (CCDRRMO).

Matud sa pangulo sa CCDRRMO Ramil Ayuman nihimo sila og preemptive evacuation sa Barangay Bacayan human adunay naluka nga punoan sa kahoy sa mahogany nga naigo ngadto sa balay.

Giingong 13 ka indibidwal ang apektado sa maong lugar ug giatiman na sa opisyales sa barangay. Gikatahong adunay nahitabong pagdahili sa yuta diha sa Sitio Cadauhan, Barangay Talamban nga nakaapektar sa kusina sa usa balay nga dunay lima ka pamilya nga nagpuyo ug natabangan na usab kini sa opisyales sa barangay.

Adunay mga reported landslide usab sa Barangay Sudlon ug Cantipla nga naaksiyonan usab dayon tungod kay nakaplastar nang daan ang mga heavy equipment sa siyudad.

Samtang si Engineer Ver Neil Balaba, hepe sa Disaster Risk Reduction Management  Division sa Office of the Civil Defense(OCD)-7 nagkanayon nga  base sa ilang assessment, sa upat ka probinsiya sama sa Bohol, Negros, Siquijor ug Cebu wala ray dagkong danyos nga natala.

Nunot niini, gikataho nga adunay mga pasahero kagahapon ang natanggong human nga gikanselar ang biyahe tungod sa bagyong Danten diin 75 ka indibidwal ang tempraryong gipahiluna diha sa San Roque gym ug giatiman na sa Department of Social Welfare and Services. Samtang pipila usa ka mga barangay sa Probinsiya sa Sugbo ang nakasinati og pagbaha nga gilangkuban sa mga barangay sa  Cansaga, Latasan, Pitogo, Larat ug Jugan Laray parehong sa Lungsod sa Consolacion.

Matud ni Danilo Capangpangan, hepe sa Municipal Engineering's Office sa lungsod nga adunay duol nga sapa nga niawas ang tubig hinungdan sa pagbaha.

Ang mga residente sa mga barangay sa Taboc, Maslog, Looc, Guinacot ug Poblacion sa Dakbayan sa Danao ang gipabakwit.

Sa laing bahin, luwas ra ang unom ka mananagat diin ang ilang gisakyan naglutaw lutaw  diha sa kadagatan didto sa amihanang bahin sa Sugbo human naguba ang makina niini.

Ang Mayor sa Lungsod sa Tudela,  Isla sa Camotes nibutyag pinaagi sa iyang face book post nga pasado alas 8:00 sa gabii nadagsa sa baybayon sa Fr. Joseph Weirtz Bayview Park, likod nga bahin sa Philippine Coast Guard Tudela Sub-Station, Barangay Southern Poblacion ang FBCA Roldan nga namarongoy sa kadagatan sa Dakbayan sa Danao alas 5:00 kagahapon sa buntag.

Ang PCG Tudela Sub-Station niila sa unom ka tripulante nga sila si Arturo Nipaya, 46,  kapitan sa bangka; Jenny Agbay, 18; Ardie Dumdom, 29; Jay Michael Agbay, 26; Nestor Marcado, 26; Petronilo de Gracia, 25, pulos molupyo sa Barangay Baliwagan, Balamban, Cebu. —Rowena D. Capistrano,  Le Phyllis F. Antojado/BDB (BANATNEWS)