Pagsirado sa U-turn slot sa SRP gilugwayan hangtud Hunyo 5

CEBU, Philippines — Gilugwayan hangtud sa Sabado, Hunyo 5 ang temporaryong pagsirado sa U-Turn Slot sa South Road Properties. Usa sa rason niini mao ang nagpadayon nga konstruksyon sa Cebu-Cordova Link Expressway (CCLEX).

Nasayran nga kagahapon unta ang orihinal nga schedule sa subling pag-abli niini apan dunay mga kakulian partikular na ang pagbunok sa kusog nga ulan.

“We will need to extend the SRP U-TURN Slot closure until 4 AM on Saturday, June 5 2021.  This is due to the consistent heavy rains that prohibited us from working continuously during the past few days,”tipik sa advisory nga gi-post sa Cebu Link Joint Venture - CLJV.)

Ang mga motorista nga mag-agi sa southbound gitambagan nga moagi sa U-Turn slot sa Compañia Maritima.  Nasayran nga giatngan na sa mga motorista ang maong taytayan nga magsumpay sa Siyudad sa Sugbo ug Lungsod sa Cordova kun diin makatabang kini sa pagminos sa traffic sa nagkadaiyang dapit sa Sugbo.

Usa sa mga features niini mao ang walo ka 40-metros nga mga krus sa matag kilid sa ibabaw nga bahin sa duha ka tower. Mosiga kini panahon sa kagabhion nga magpakita sa simbolo nga ang Cebu maoy usa sa mga lugar sa Asya nga nag-ugmad sa Kristiyanismo.

Ang CCLEX gidumala sa Cebu Cordova Link Expressway Corporation (CCLEC) inubanan sa joint venture agreement sa Local Government Units sa Cebu City ug Lungsod sa Cordova diin target niini nga mahuman sa hinapos nga bahin karong tuiga. —MEL (BANATNEWS)