Honoraria alang sa 2019 Cebu City Olympics i-release na
CEBU, Philippines — Gikatakdang i-release sa kagamhanan sa Siyudad sa Sugbo sulod karong buwana ang honoraria sa mga nalambigit sa 2019 Cebu City Olympics.
Kini maoy gibutyag kagahapon ni City Legal Officer Rey Gealon.
Matud ni Gealon nga niisyu sa niaging semana ang City Legal Office og revised legal opinion.
Giingong walay legal impediment nga magtugot sa paghatag og honoraria hinungdan nga gihimoan kini og amendment aron mohaom kini sa pipila ka probisyon.
“On 17 December 2019, CLO issued Legal Opinion 154 - ECL directing the amendment of some of the provisions of the contract which may be violative of existing rules and regulations of DepEd and COA’s limit of expenses chargeable to the Special Education Fund”, matud ni Gealon.
Gibutyag usab ni Gealon nga nakadawat ang iyang buhatan og revised contract niadtong Mayo 6, 2021.
Una na nga gibutyag kaniadto ni City Sports Commissioner Jessica Jawad-Honoridez nga wala pa gyud kadawat ang officiating officials sa ilang honoraria sulod sa usa ug tunga sa tuig sukad nahitabo ang City Olympics niadtong Nobiyembre 2019.
Giingong taud-taod na kini nga naduso sa Local School Board sa wala pa ang 2019. Ang maong isyu nikatap sa niaging semana human usab niulbo kaniadto ang kontrobersiya kalabot sa mga subsidy ug premyo sa mga kompetisyon sa Sinulog nga giingong wala pa nahatag. BDB (BANATNEWS)
- Latest
