Bagyong Dante gibantayan

CEBU, Philippines — Alerto sugod palang kagahapong adlawa ang Sugbo nunot sa pagsulod sa bagyong Dante hinungdan nga 36 ka mga siyudad ug kalungsoran lakip ang Metro Cebu ang gipaubos sa storm warning signal number 1.

Apil sa mga gipaubos sa TWSC mao ang mga lungsod Daanbantayan, Medellin, Bogo, San Remigio, Tabogon, Borbon, Tabuelan, Sogod, Tuburan, Catmon, Carmen, Danao City, Asturias,

Balamban, Compostela, Liloan, Cebu City, Mandaue City, Lapu-Lapu City, Consolacion, Cordova, Toledo, Talisay, Minglanilla, City of Naga, Pinamungahan, San Fernando, Aloguinsan Carcar ug ang mga lungsod sa Bantayan Island ug Camotes Islands.

Lakip sa gipaubos sa signal no. 1 ang Metro Cebu apil ang daglong siyudad sa Cebu City, Lapu-Lapu City ug Mandaue City.

Tungod niini, anaa sa blue alert status ang Provincial Disaster Risk Reduction and Management Office (PDRRMO), pasabot niini, andam na ang mga emergency responders ug ang mga ekipo nga gamiton kon ugaling adunay mga emerhensiya.

Si Niel Sanchez, pangulo sa PDRRMO atol ning pagsulat sa balita wala pay nadawat nga report gikan sa nahisgutang mga lungsod kun dunay gipabakwit nga mga residente gawas lang sa mga na-stranded nga pasahero human gikanselar sa Philippine Coastguard ang mga biyahe sa barko.   Sumala sa PDRRMO, 290 ka pasahero ang nastranded sa pantalan sa Danao samtang 50 ang sa Hagyana Port sa lungsod sa San Remegio.

Si Sanchez nagkanayon sa iyang update sa mga LDRRMOs sa kalungsoran, nakasinati ang Northern Cebu og katag katag nga pag-ulan inubanan sa hinay ngadto sa kasarangan nga hangin.

Si Sanchez nagkanayon nga kinahanglan ang mga local emergency responders hangtod sa barangay level momonitor gyud aron malikayan nga adunay disgrasya nga mahitabo.

Sa pikas bahin, si Ramil Ayuman, ang administrative head sa Cebu City Disaster Risk Reduction and Management Office (CDRRMO) miingon nga nakaandam kanunay ang mga gamit ug heavy equipment sa siyudad.

Hugot nilang gibantayan ang mga bukirang barangay ug kadtong mga kilid sa mga sapa kun magbunok ang uwan nga moresulta sa landslide ug pag-awas sa mga kasapaan.

Gipahimagnoan ni Ayuman ang mga nagpuyo duol sa mga sapa ug bakilid nga mga lugar nga kanunay panid-an ang ilang palibot ug gidasig sila nga mas maayong mohiklin nalang daan sa mas luwas nga dapit.— Sanden J. Anadia/IBM (BANATNEWS)