Ordinansa sa parking diha sa Fuente ipausab sa CCTO

CEBU, Philippines — Aron mahimong luwas o malayo sa peligro ang bikers girekomendar sa Cebu City Transportation Office (CCTO) ngadto sa city council nga adunay gamay nga usbon sa ordinansa nga nagtugot sa mga sakyanan nga mag-parking diha duol sa Fuente Osmeña Circle.

Tumong niini nga mahatagan og igong kahamugaway ang bike lanes sa maong dapit.

Nasayran nga hapit na usab mahuman ang bike lanes diha sa Fuente.

Matud sa deputy head for operations sa CCTO nga si Paul Gotiong nga nakadawat siya og mensahe sa mga kritiko ug netizen nga nisaway sa bike lanes nga giingong kuyaw kaayo kini sa Fuente area.

Apan nakakita siya og usa sa mga alternatibong pamaagi nga mahimong luwas ang bikers sa pag-agi sa bike lanes diha sa Fuente.

Kini mao ang pagmenos sa gidaghanon sa sakyanan nga nag-park doul sa rotunda.

Matud niya nga naduso na ngadto sa konseho ang maong plano ug padayon pa kini nga gitun-an karon.

Giawhag ni Gotiong ang publiko ilabi na ang mga motorista nga respetohon ang bike lanes aron malikayan ang disgrasya sa kadalanan. BDB (BANATNEWS)