Armas nikagar nabawsan sa mga polis patay
CEBU, Philippines — Patay diha-diha dayon ang usa ka gipasanginlang durugista human nisuway pagpusil sa mga operatiba nga nagpahigayon og buy bust operation batok kaniya diha sa Purok Santan Petrapael, Barangay North Poblacion, lungsod sa San Fernando kagahapon sa buntag.
Samtang ang iyang kauban nga nikaging sa panghitabo ang nadakpan ug giila nga si Nilo Valera Managpu,35.
Ang napatay sa kapolisan mao si Joseph Esbra Ubanan, nagpuyo sa nahisgutang lugar kinsa naila nga High Value Individual sa kampanya batok sa ilegal nga drugas diha sa maong lungsod. Apan matud pa nakabantay si Ubanan nga polis ang iyang gibaligyaan sa drugas nibunot kini sa iyang armas ug gipusil kini apan nikagar ang armas ug wala makabuto.
Tungod niini nabawsan kini sa pagpusil sa mga operatiba ug naigo sa nagkadaiyang bahin sa iyang lawas.
Si Dr. Alfredo Manugas VI nga maoy Rural Health Officer sa lungsod sa San Fernando kinsa maoy misusi sa iyang lawas diha sa crime scene mideklarar nga patay na kini.
Nakuha sa mga polis gikan sa mga suspetsado ang usa ka revolver nga kargado og unom ka bala; 16 ka gagmay nga pakite ug usa ka medium nga pakite sa shabu; P300 nga salapi ug cellphone.
Ang drugas nga nakuha nitimbang og 4.2 gramos nga adunay gibana-bana nga balor nga P27,880. Ang dinakpan gibalhug sa bilangguan nga gikatakdang pasakaan og kaso.— IBM (BANATNEWS)
- Latest
