Labella niisyu og EO pagbukas sa tanang rota sa PUJ

CEBU, Philippines — Human sa pipila ka buwan og pinaabot giaprobahan na ni Cebu City Mayor Edgardo Labella ang tinguha nga ablihan ang tanang rota sa Public Utility Jeep sa Siyudad sa Sugbo.

Giisyu na kagahapon ni Labella ang iyang Executive Order No.131 kalabot   sa maong kalamboan.

Lakip sa maong EO ang kondisyon sa pagpatuman sa istriktong health protocols.

Nasayran nga subay kini sa rekomendasyon sa Cebu City Jeepney Task Force.

Ang maong kalamboan gihangop kini sa chairman sa Jeepney Task Force nga si Konsehal James Cuenco.

Matud ni Cuenco nga mahuwasan na gyud ang taud-taod nga suliran sa commuters  diin maglisod  kini og pangita og kasakyan tungod kay dili igo ang gidagahanon sa pampublikong sakyanan nga nagdagan sa karsada ilabi na nga namalik na sa probinsiya ang ubang mga bus.

Sa kasamtangang sitwasyon kapin lang sa 20 ka rota ang gibuksan.

Matud pa sa Cebu City Transportation Office (CCTO) deputy head for operations ug spokesperson Paul Gotiong nga adunay kapin sa 60 ka rota ang siyudad.

Ang mga drayber nga mopaubos sa Balik Pasada Program mag-agi gihapon og mga seminar.

Nasayran nga 532 ang kasamtangangang nagdagan nga PUJ. —BDB (BANATNEWS)