LGUs giawhag nga magmabinantayon batok sa ASF

CEBU, Philippines — Ang Department of Agriculture-7 padayon kining nipahimangno sa local government units sa kanunanay’ng pagpangandam kong ugaling adunay mga baboy nga nangamtay diha sa ilang lugar tungod kay ang African Swine Fever (ASF) nagkaduol na kini sa rehiyon-7.  

Si Gregolito Bunado, program coordinating officer sa DA-7 niawhag usab sa municipal agriculturists sa pag-identify og graveyard o kalubngan sa culled swine diha sa 500 meter radius aron malikayan ang pagkatag sa virus.

Matud ni Bunado nga kinahanglang palig-onon ang pagbantay diin molanat sa tulo ngadto sa lima katuig ang pag-recover gikan sa infection.

Ug nagkinahanglang ang tanan magtinabangay aron magpabilin ang rehiyon-7 nga luwas gikan sa ASF.

“Aside from the preventing measures, we also have to prepare for the worst”, matud ni Bunado.

Lakip sa mga measure nga ilang gihimo mao ang provision sa disinfectant ug ubang mga ekipo alang sa disposal, lapad nga impormasyon ug education campaign ang gipahigayon sa tibuok probinsiya.

Ang Siquijor Provincial Veterinarian Dr. Bernadita Tabad nipahimangno sa tanang LGUs ug swine raisers sa probinsiya nga i-enroll og insurance ang ilang mga baboy aron maka-avail sila og indemnification gikan sa DA.

Ug nisugyot usab sila sa pagpahigayon og weekly monitoring sa mga grocery store ug meat outlets pagsuta nga walay gipamaligyang processed meat gikan sa infected area.

Sayo pa, si Presidente Rodrigo Duterte niadtong Mayor 10, 2021 nideklara kini nga ubos sa state of calamity ang nasud gumikan sa ASF outbreak sulod sa usa ka tuig.

Si Salvador Diputado, direktor sa DA-7 nihangop sa maong deklarasyon ilabi na nga ang Central Visayas nagpabilin kining luwas sa ASF. The Freeman/BDB