Tulo ka kawatan sa Mandaue ug Naga nasikop

CEBU, Philippines — Gitanggong karon sa detention cell sa Presinto 6 sa Mandaue City Police Office (MCPO) ang usa ka tawo kinsa nadakpan sa hot pursuit operation tungod sa pagpanagit niini og black van type multicab sa Purok Chicos, Upper Tawason, Dakbayan sa Mandaue niadtong Huwebes sa hapon.

Si Police Chief Master Sergeant Abraham Sabang sa Presinto 6 niila sa suspetsado nga si Alfred Igot Santillan, 27, taga Barangay Yati sa Lungsod sa Liloan.              

Matud ni Sabang nga nidangop sa ilang buhatan ang biktima nga si Bernardo Luage Borbon Jr., hingkod ang panuigon, taga Villa Leyson Subdivision, Barangay Talamban, Dakbayan sa Sugbo.

Ang kapolisan ubang sa Highway Patrol Group-7 nipahigayon kini og hot pursuit operation nga niresulta sa pagkasikop sa suspetsado.

Sa laing bahin, duha ka lalaki ang nasikop sa kapolisan sa Dakbayan sa Naga human sila giingong nangawat og cellphone sa mga pasyente diha sulod sa isolation center sa Barangay South Poblacion niadtong Huwebes sa kadlawon.

Laing usa ka kauban sa mga suspetsado ang nakaeskapo.

Ang mga nasikop mao sila si Francis Misenabre, 23, taga Sitio Tapon, Barangay Tinaan ug Denver Dagohoy, 39, minyo, taga Purok Talon 2, Barangay South Poblacion sa maong dakbayan.

Base sa imbestigasyon sa kapolisan nga ang mga suspetsado nisaka kini sa kural sa isolation center aron kini makasulod.

Nasakmit gikan sa mga suspetsado ang unom ka nagkalain-laing klase sa cellphone.

Ang lima ka biktima parehong mga residente sa dakbayan ug mga pasyente sa COVID-19. Rowena D. Capistrano/BDB (BANATNEWS)