Muslim community sa Cebu misaulog sa Eid’l Fitr
CEBU, Philippines — Bisan sa pandemiya ug paghigpit sa gobiyerno batok aning pagtapoktapok sa daghang mga tawo sa mga relihiyosong kalihokan, malampuson ug solemni nga gitak-opan sa mga Pilipinong Muslim ang Ramadan pinaagi sa Eid’l Fitr kagahapon sa buntag.
Sa Dakbayan sa Talisay, gibanabanang 400 ka mga miyembro sa Muslim community sa maong siyudad ang nagtapok sa ilawom sa taytayan sa Mananga sa Barangay Tabunok aron didto sugaton ang kasaulogan.
Si Malik Rasul, lider sa muslim community sa Talisay miingon nga sa ilang pag ampo ila gihapon nga gisunod ang health protocol subay sa mando sa gobiyerno.
Gipahibalo niya nga wala kaayo sila maapektahi sa pandemiya gumikan sa ilang panagtinabangay matag usa.
Lakip sa niduyog sa ilang selebrasyon ang kapulisan sa dakbayan pinangulohan Police Lt. Roberto Barnido Jr, deputy chief sa Talisay City Police Station. Susamang selebrasyon sab ang gihimo sa uban pang mga Muslim communities sa nagkadaiyang siyudad sa Cebu kagahapong adlawa.— IBM (BANATNEWS)
- Latest